من يومين كده كنت بعمل إنترفيو في شركة محترمة لوظيفة موارد بشرية، وده علي أساس إن خبرتي في الـ Civil Work تؤهلني وإني كنت HR في“Step Up” و”أنا فني” وشغال في دليل لمدة سنتين قبل كده ولافف ورايح وجي فأكيد فاهم “الزتونه” بتاعة الـ HR .. يعني لعب عيال!

المهم دخلت الإنترفيو وأنا نافخ صدري وبعد أول دقيقتين كنت عمّال أنزِّل عرق من كل حته..الراجل حط عليا بكل ما تحمل الكلمة من معنى! يقولي عارف كذا؟ اقوله اه طبعاً وأتكلم كلمتين.. يضحك ويقولي مين قالك كده؟ويسأل تاني أقوله لأ مش عارف.. يقعد يشرحلي – كان راجل محترم الصراحة – وفي الأخر عملي إختبار تحديد شخصية ظريف كده وقالي إنت عادي جداً، يعني حتى مفيش شئ مميز فيك، كله في المتوسط.

المهم وأنا كنت بحاول أخد بعضي وأمشي أروح البيت، قالي خد التاسك ده إبحث عنه وتعالالي بكره. روحت ورجعت بأربع إجابات لسؤاله، طلعت واحدة فيهم بس هي الصح والباقي كله خطأ. برغم كل ده إتقبلت معرفش ازاي. والله راجل قمة في الإحترام. إيه رأيك بقى بعد ما إتقبلت إعتذرت له وقلتله شكراً خلاص مش عاوز. عشان كان بيقولي عاوزك تركّز بس في الموارد البشرية وتسيب أي شئ أخر،وأنا شخصية عبيطة ومش بعرف أعمل ده وبزهق بشكل سريع بصراحة فمشيت.. ما علينا. 

الغرض من الرغي ده بقىإنك تبقى عارف حجمك الحقيقي، وما تفرحش بقشور العلم والمعرفة اللي بتاخدها في الـ Civil Work ولا بكلام الناس أو الهالة اللي حواليك. إنت كأنك لسه بتفتح الباب. تعمّق أكثر وحط راسك في الأرض وتواضع واسمع وتعلم عشان كمان سنة أوإثنين تبقى فعلاً تستحق لقب زي HR أو Trainer أو Organizer أو Designer .

الـ Civil Work مجرد بيساعدك تحط رجلك على أول الطريق. هتتعوج على الناس وتتنطط عليهم مش هتتعلم حاجة وإنت اللي هتخسر مش أي حد تاني.

بقلم: عمرو بدر

مراجعة: مازن أحمد قباري