“ثورة في التعليم والفن والثقافة والعلم قادرين على محاربة الإرهاب والفساد والتعصب”
1- نحب تعرَّف بحضرتك؟
أنا فارس السياجي، خريج فنون جميلة قسم تصوير عام 2011 من المحلة الكبرى وكنت بحب الرسم عموماً والمزيكا بحكم إن أهلي مهتمين بالمجالات دي دايماً وخالي وعمي كانوا بيرسموا وبيلعبوا مزيكا.
كنت بكره المذاكرة وأنا في ابتدائي فقررت أهرب من إني أكتب درس القراءة عشر مرات(زي ما كانت الأستاذة بتطلب دايماً) وبقيت بضحك عليهم إني أرسم الرسمة الموجودة في الكتاب في كراستي وأن اكتب الدرس مرة واحدة بس! دي كانت بداية حبي للرسم بشكل عام.
أول رسمة بورتريه رسمتها كانت لأبويا، كان تعبان فحبيت أفرحه.
2- امتى كانت بداية شغفك بفن التصوير وامتي قولت أنا عايز أدخل كلية الفنون الجميلة وأكون فنان تشكيلي؟
مكنتش عاوز أدخل فنون جميلة لخوفي من إن الدراسة تكرهني في الرسم، بسبب كرهي الشديد للدراسة وطريقتها في مصر بشكل عام. لكن في النهاية دخلت فنون جميلة بعد لخبطة كتيرة بسبب عدم قبولي في امتحان القدرات وأني كنت غير لائق وعملت تظلم وحاجات كده.
3- هل كان المحيط الخاص بك متقبل حلمك إنك تكون فنان تشكيلي؟ خصوصاً أن مجتمعنا بيحفز الأجيال الأصغر سناً في اتجاهات فكرية مناهضة لفكرة الفن بشكل عام.
أهلي كانوا بيشجعوني دايماً على إني أختار السكةاللي أحبها. مكانوش بيجبروني على حاجة، وهما أكتر حد شجعني لدخول فنون جميلة. كان خوفهم من قسم تصوير (اللي أنا اختارته ورفضت أكتب جرافيك في الرغبات) لكن سابوني أخد قراري واختار سكتي من غير أي ضغط منهم .
4- مين الفنانين أو الشخصيات اللي تأثرت بيهم؟
أولهم والدي بالطبع بحكم قربه مني وتربيته وحبه لي بشكلٍ كبير وأكيد العكس. والفنانين كان أكثر حد أثر في هو رمبرانت، خصوصاً إني حبيت رسم البورتريه جداً وكان مثال قوي للإختلاف. لما دخلت الكلية لقيت معظم الطلبة بيرسموا بنفس الطريقة ونفس الأسلوب، أوت لاين، لون ناعم، إحساس ميت، ناس حافظة مش فاهمة وبيقلدوا بعض، لكن لما شوفت لوحات رمبرانت وعرفت أسلوبه لقيت تمرد شديد إنه بيرسم لون سميك ومن غير خطوط بإحساس عالي جداً فحبيت أتبع أسلوبه أو أستفيد منه وأحاول أكون مختلف عن الباقيين .
ومؤخراً كان فيه حد كمان مؤثر بشكل كبير جداًوهو الفنان هاني المصري اللي بعتبره قدوة حقيقية ليا ولأي حد حابب يكون فنان مختلف. رمز للمثابرة والقوة والإبداع والصدق والتفاؤل والإيجابية. بعتبره أستاذي برغم إني مقابلتوش ولا مرة بشكل شخصي.
5- هل عشان تبقى فنان بيحتاج إنك يبقى عندك خبرة في الشئ اللي بتمارسه ولا تكون فقط موهوب فيه؟
عشان أكون فنان طبيعي يكون عندي الأدوات اللازمة لده. الموهبه مش كفاية. الموهبه هي مجرد هبة من الله وضعها في البعض بدون أي تدخل من اللي عنده الموهبة، لكن اللي يخلي حد فنان وحد لا هو رغبته في إنه يكون فنان وعمله في سبيل ده واستخدامه لموهبته في الطريق الصحيح.
6- ما هي أهم أعمالك المنفذة بالنسبة لك؟
مشروع تخرجي اللي كان بداية لأسلوبي الحقيقي وإني أكون قادر على التعبير عن أفكاري ومشاعري بشكل كبير. لم تكنأول تجربة ليا لكن كنت بجرب كتير وبرسم كتير وبشارك في معارض كتيرةأيام دراستي، لكن هو يعتبر بداية الطريق المتزن لي.
7- هل فكرت في وقت ما إنك تغير المشوار المهني بتاعك خاصة إنك اضطريت تغير محافظتك وتسيب أسرتك وتستقر في الإسكندرية عشان تقدر تشتغل؟ خاصة إن المجال ممكن يكون غير مربحمثل مجالات تانية كتير؟
لا أعتبر الفن مشوار مهني لكنه حياة كاملة.المشوار المهني هو مجرد وسيلة لكسب العيش،إنما الفن هدفه أسمى من ده بكتير وأهم. عشان كده عمري ما فكرت أبعد عن الفن لإنه اصبح جزء حقيقي من حياتي،إنما الوظائف كان لي تجارب كتيرة، لكن لا أظنأنها بعدت كتير عن مجالي. وكان محاولاتي كلها في إني أكون شغال في نفس مجالي لحد ما قدرت أنفذ ده بتأسيسي لـ”تحويجة”.
8- في رأيك معظم خريجين قسم التصوير وقسم النحت بيشتغلوا في التصميم الجرافيكي،في إعتقادك ما نتيجة ذلك؟
ده لإن دراستهم وفهمهم لدراستهم ضعيفة جداً في الكلية وإرتجالية بشكل كبير، بالتالي نادراً لما يتخرج حد بيفهم في مجاله الحقيقي بجد. والشئ الثاني إنلا يوجد فرص عمل حقيقية للأقسام الثانية في السوق بحكم إن الدراسةغير تطبيقية. وفي العالم كله اللوحات والفن التشكيلي عموماً له سوق خاص بيه مُربح وفي نفس الوقت راقي، إنما في مصر السوق يريدأذواق منحطة جداً و ده يرجع لثقافة المجتمع والمنظومة التعليمية بأكملها والحالة الإقتصادية اللي بتخلي هدف أي حد هو السلع النفعية الحياتية فقط، و بيكون الفن أخر شئ ممكن حد يفكر فيه.
9-هلالسوشيال ميديا ووجود مواقع مثل“Pinterest”المتخصصة ساعد في تعميق الفنون البصرية عند العامة وأهميتها في التعبير عن الأفكار؟
السوشيال ميديا والإنترنت عموماً من أهم الوسائل للتعبير الحر عن الفكر، ومن أهم وسائل العرض للأعمال الفنية لإنها بتسهل الطريق وبتخرجنا من القاعات المغلقة العقيمة للمعارض اللي مش بيدخلها غير طبقة إجتماعية واحدة فقط.إنما الإنترنت بيوصل الفن للجميعومش بصورة محلية فقطولكن بصوره عالمية أيضاً.
10- هل يوجد جهات أو هيئات في مصر بتدعم الفن بشكل قوي ومؤثر؟
الهيئات اللي بشوفها بتدعم الفن والإبداع بشكل حقيقي في نظري هي المؤسسات المستقلة اللي أنشأها الشباب في الفترة الأخيرة. إنما المؤسسات الحكومية في نظري هي وسيلة إعلاميه فقط والمنظومات الموجودة عندنا فشلت وفيها قيود كبيرة جداً لأي فنان يمارس فن حقيقي حر. في رأيي الأمل في المؤسسات المستقلة القائمة على الفنانين الشباب، ومن بعدها يكون السبيل في إصلاح المؤسسات الحكومية والمنظومات بشكل عام.
11- ما هي الرسالة اللي بتحاول توصلها من أعمالك؟ وهل تميل للأعمال الواضحة الصريحة ولا اللي تحتوي شيئاً من الغموض؟
الرسالة اللي بوصلها من أعمالي هي مجرد الصدق. الصدق في الفن والمشاعر والتعبير، بدون توضيح أكثر من كده. أما عن فكرة الغموض أو الوضوح فده مش مقياس أبداً للعمل الفني الناجح إنما لو كان العمل صادق وحقيقي، فسوف يفرض نفسه أمام أعين ومشاعر الناس. يعني جايز الموضوع مشابه للمزيكا، المزيكا الصادقة بتوصل للكل، والمزيكا الغير صادقة بتمر مرار الكرام ومحدش بيفتكرها.
12- إيه أكثر مدرسة متأثر بيها؟
الحقيقة مش مدرسة معينة. أنا أؤمن بالتجارب الفنية الحرة الغير مقيدة بأي تصنيفات، فأنا بحب كل الإتجاهات الفنية مادامت صادقة. جايز ميلي أكبر لأسلوب وأفكار وتعبير الفنان فرانسيس بيكون، ومن تبعه من الإتجاه ده. ميلي كبير للعنصر البشري في العمل الفني عموماً.
13- من أقوال “بابلوبيكاسو” “الرسم طريقة أخرى لكتابة المذكرات” هل بتشوف إنأي لوحة بيعملها الفنان بيكون وراها دائماً مثير حركة ممكن يكون مرتبط به بنسبة أكبر؟
أكيد صح، وفيأسباب تانية كتير. مش لازم يكون الفنان بيعمل عن ذكريات أو حاجات متعلقة به، لكن له فنانين كتير عبروا عن مواضع مختلفة سياسية وإجتماعية وغيرها. غير طبعاً لو إتكلمنا عن التجريد. لكن أنا مؤمن إن أي عمل فني فيه جزء من روح الفنان بيخلد بخلود عمله، أيا كان سبب تنفيذه للعمل ده.
14- لو مكنتش فنان تشكيلي، تفتكر كان ممكن تكون إيه؟
الحقيقه مش عارف، وجايز لسه مقدرش أقول على نفسي “فنان”، لإن اللقب ده مسؤولية كبيرة في رأيي، ومش عارف إن كنت قادر على حمل المسؤولية دي ولا لأ.
15- في رأيك تأثير الفن في الفترة الحالية أفضل من فترات سابقة أم لا؟
طبعاً الفن مؤثر جداً الفترة دي، خصوصاً فترة ما بعد الثورة- ٢٥ يناير٢٠١١- وظهور فنون عديدة بداية من فنون الشارع والجرافيتي، للموسيقى المستقلة و غيرهاالكتير من الفنون الليانفجرت خلال و بعد الثورة اللي لأول مره توصَّل الفنون دي للناس العادية، مش اللي بيقولوا عليهم “مثقفين” فقط. وأظن كمان اهتمام الناس بالقراءة زاد بشكل ضخم، حتى لو كانت موضة قراءة الروايات مثلاً، لكن أظن إنها موضة حلوة ومفيدة. ياريت الموضات كلها تبقى كده يعني!
16- إيه هو أكبر أحلامك وإيه طموحاتك في الفترة الجاية؟
حاجات كتير،أولهم وأهمهم هواستمرار واستكمال الثورة بشكل صحيح، الثورة مش بمعنى المظاهرات، لكن بمعنى ثورة اعمق في كل المجالات. ثورة في التعليم والفن والثقافة والعلم. الإهتمام بالمجالات دي كلها أظن أهم بكتير من أي مجالات تانية، وقادرين على تغيير حقيقي قادرين على محاربة الإرهاب والفساد والتعصب والفشل أقوى مليون مرة من محاربتهم بالسلاح.
